ഹിന്ദുമതത്തില്‍, സനാതനധര്‍മ്മത്തില്‍ പല ദേവതകളെക്കുറിച്ചു പറഞ്ഞിരിക്കുന്നതു കാണുവാന്‍ കഴിയും. എങ്ങും നിറഞ്ഞുനില്ക്കുന്ന ആ ശക്തി. ഏകം സത് വിപ്രാ ബഹുധാ വദന്തി.

ഭാരതത്തില്‍ ഓരോ പ്രദേശത്തും വ്യത്യസ്ത ആചാര അനുഷ്ഠാനങ്ങളാണു നിലവിലുള്ളതു്. വ്യത്യസ്ത സംസ്‌കാരത്തില്‍ വളര്‍ന്നവരാണു് ഇവിടെയുള്ളതു്. പല ദേശക്കാരും പല രാജാക്കന്മാരും ഭരിച്ച നാടാണിതു്.

അതു കാരണം ഓരോരുത്തരുടെയും സംസ്‌കാരത്തിന് അനുസരിച്ചുള്ള ആരാധനാ സമ്പ്രദായങ്ങളും പല ദേവതാ സങ്കല്പങ്ങളും നിലവില്‍ വന്നു. എന്നാല്‍ എല്ലാത്തിലും കുടികൊള്ളുന്ന ശക്തി ഒന്നു തന്നെയാണു്. പച്ച സോപ്പായാലും നീല സോപ്പായാലും ചുവന്ന സോപ്പായാലും പതച്ചാല്‍ എല്ലാം വെള്ള തന്നെ.

അതുപോലെ ഈ ദേവതകളിലെല്ലാം കുടികൊള്ളുന്ന ശക്തി ഒന്നുതന്നെ. ആ ഏക ദൈവത്തെയാണു നമ്മള്‍ സാക്ഷാത്കരിക്കേണ്ടതു്. ആ ശക്തിചൈതന്യം നമ്മുടെ ഉള്ളിലുമുണ്ടു്. അതു് എങ്ങും നിറഞ്ഞു നില്ക്കുന്ന ചൈതന്യമാണു്.

പാടുന്ന കുയിലിലും കരയുന്ന കാക്കയിലും അലറുന്ന സമുദ്രത്തിലും ഗര്‍ജ്ജിക്കുന്ന സിംഹത്തിലുമെല്ലാം അതു് നിറഞ്ഞു നില്ക്കുന്നു. അതു് എങ്ങും നിറഞ്ഞുനില്ക്കുന്ന ശക്തിയാണു്. അതനുഭവിച്ചറിയേണ്ടതാണു്.

നമ്മുടെ കണ്ണിലൂടെ കാണുന്നതും ചെവിലൂടെ കേള്‍ക്കുന്നതും നാവില്‍ കൂടി രുചിക്കുന്നതും ആ ശക്തിതന്നെയാണു്. നാസികയില്‍ കൂടി മണക്കുന്നതും ത്വക്കിലൂടെ സ്പര്‍ശിക്കുന്നതും നടക്കുമ്പോള്‍ കാലിലൂടെ പ്രവര്‍ത്തിക്കുന്നതും എല്ലാം ആ ഒരു ശക്തിതന്നെ.

എല്ലാവര്‍ക്കും ഒരേ ഉപദേശം നല്കുവാനാവില്ല. ഒരേ കാര്യം തന്നെ പറഞ്ഞാല്‍ ഓരോരുത്തരും വ്യത്യസ്ഥ രീതിയില്‍ ആയിരിക്കും ഉള്‍ക്കൊള്ളുക. അതിനാലാണു് ആദ്ധ്യാത്മിക ഉപദേശങ്ങള്‍ ആളറിഞ്ഞു നല്‌കേണ്ടതാണെന്നു പറയുന്നതു്.

ഇന്നു് ഇവിടെ കൂടിയിട്ടുള്ള മക്കളില്‍ തൊണ്ണൂറു ശതമാനം പേരും ആദ്ധ്യാത്മികത ശരിക്കു മനസ്സിലാക്കിയിട്ടുള്ളവരല്ല. ഓരോരുത്തര്‍ക്കും അവരുടെ ചിന്താശക്തിക്കും സംസ്‌കാരത്തിനും അനുസരിച്ചേ കാര്യങ്ങള്‍ ഉള്‍ക്കൊള്ളുവാന്‍ കഴിയൂ. അതിനാല്‍ ഓരോരുത്തരുടെ തലത്തിലേ ഇറങ്ങിച്ചെന്ന് ഉപദേശം പറഞ്ഞു കൊടുക്കേണ്ടതുണ്ടു്.

ഒരു കടയിലുള്ള ചെരിപ്പുകള്‍ എല്ലാം ഒരേ വലിപ്പത്തിലും ഒരേ ഫാഷനിലും ഉള്ളതാണു് എന്നു കരുതുക. നൂറു് ആളുകള്‍ വന്നാലും എല്ലാവര്‍ക്കും നല്കാന്‍ ഒരേ അളവിലുള്ള ചെരുപ്പുകള്‍ മാത്രമേ അവിടെയുള്ളൂ. ചെരുപ്പുകള്‍ ധാരാളമുണ്ടെങ്കിലും ആ കട കൊണ്ടു വലിയ പ്രയോജനമുണ്ടാവില്ല. വിവിധ അളവിലുള്ള ചെരുപ്പുകള്‍ ഉണ്ടെങ്കിലേ വരുന്നവര്‍ക്കു് അവരവര്‍ക്ക് ഇണങ്ങുന്ന തരത്തിലുള്ളതു തിരഞ്ഞെടുക്കുവാന്‍ കഴിയൂ.

ഇതുപോലെയാണു നമ്മുടെ സംസ്‌കാരം, സനാതനധര്‍മ്മം. വിവിധ മാര്‍ഗ്ഗങ്ങള്‍ ഇതില്‍ കാണുവാന്‍ കഴിയും. പല സംസ്‌കാരത്തില്‍ വളരുന്നവരെ ഉദ്ധരിക്കണമെങ്കില്‍ അവരുടെ മനസ്സിന് അനുസരിച്ചുള്ള ഉപദേശം നൽകണം. അവരുടെ ജീവിത നിലവാരത്തിന് അനുസരിച്ചുള്ള മാര്‍ഗ്ഗത്തിലൂടെ നയിക്കേണ്ടതുണ്ടു്. അങ്ങനെയേ അവരെ ലക്ഷ്യത്തിൽ എത്തിക്കുവാന്‍ കഴിയൂ.

ജോലിക്കു് ആളെ വേണമെന്നു കാണിച്ചു കൊണ്ടുള്ള പരസ്യം പലപ്പോഴും പത്രങ്ങളില്‍ കാണാം.

എം.എ. ഡിഗ്രി വേണം. നീളം ഇത്ര വേണം. ആരോഗ്യത്തിനു കുഴപ്പമില്ലെന്നു കാണിക്കുന്ന ഡോക്ടറുടെ സര്‍ട്ടിഫിക്കറ്റു വേണം. സ്വഭാവ സര്‍ട്ടിഫിക്കറ്റു വേണം. ഇതൊക്കെയുള്ളവര്‍ക്കേ അപേക്ഷിക്കുവാന്‍ പാടുള്ളൂ.

ഈ യോഗ്യതയെല്ലാം ഉള്ളവര്‍ക്കു വേണ്ടിയുള്ള എഴുത്തു പരീക്ഷയും കഴിഞ്ഞു. ഇൻ്റര്‍വ്യൂവും കഴിഞ്ഞു. പക്ഷേ, എല്ലാ ചോദ്യങ്ങള്‍ക്കും ശരിയായ ഉത്തരം നല്കിയ ചിലരെ എടുത്തു കണ്ടില്ല. എന്നാല്‍ അത്രയൊന്നും നന്നായി ഉത്തരം പറയാത്ത ചിലരെ ജോലിക്ക് എടുക്കുകയും ചെയ്തു.

ഇതു പലപ്പോഴുമുള്ള അനുഭവമാണു്. എന്താണിതിനു കാരണം. ഇൻ്റര്‍വ്യൂ ചെയ്ത ആളുടെ മനസ്സിനെ അലിയിപ്പിക്കുന്ന ആ കൃപ അവരില്‍ ഇല്ലാതെ പോയി. ആ കൃപ ഉള്ളവര്‍ക്കാകട്ടെ, ഉത്തരം ചിലതൊക്ക തെറ്റിയെങ്കില്‍ക്കൂടി ജോലി ലഭിക്കുകയും ചെയ്തു.

പ്രയത്‌നത്തിലുള്ള വിജയം കൃപയെക്കൂടി ആശ്രയിച്ചിരിക്കുന്നു. എല്ലാ പ്രയത്‌നത്തിനുമുപരി ആ കൃപ കൂടി വന്നാലേ എന്തും പൂര്‍ണ്ണമാവുകയുള്ളൂ, ജീവിതത്തിൻ്റെ ഒഴുക്കു മുന്നോട്ടുള്ളതാകൂ. ആ കൃപ നേടണമെങ്കിലോ, കര്‍മ്മത്തില്‍ ശുദ്ധിയുണ്ടാകാതെ സാദ്ധ്യമല്ല.